ಕೊನೆಯ ಭೇಟಿ

ಎಚ್ಚರಿಸುವೆ ನನ್ನ ನಾನೇ - ನಮ್ಮ ಕೊನೆಯ ಭೇಟಿಯಿದೆಂದು;
ಗೊತ್ತಿದೆ ನನಗೆ - ಎಲ್ಲಕೂ ಕೊನೆ ಇಂದು.
ಕೊನೆಯ ಮಾತು ಕೊನೆಯ ನೋಟವಿದು,
ಕೊನೆಯ ಮುತ್ತು ಕೊನೆಯ ರಾತ್ರಿಯಿದು.
ನನ್ನ ಪಾಲಿಗೆ  ನಾಳೆಯೆಂಬುದು ಬರೀ ಕತ್ತಲು
ನಿನಗಾದರೋ ಅದು ಹೊಸ ಹಗಲು.

ಕಾಣುವುದು ನಿನ್ನ ಕಂಗಳಲಿ -  ಇನ್ನಾರದೋ ನೆರಳು
ಒಡನೆ ಕಾಣುವೆ ಅಲ್ಲಿ - ನಿನ್ನ ಮನಸಿನ ಅಳಲು.
ಬೇರೆಯೇನಲ್ಲ, ನನ್ನ ವಂಚಿಸಿ ತೊರೆದುದಕೆ ಪಶ್ಚಾತ್ತಾಪವೇ ಇದು;
ನಿನ್ನೊಲವಿಗಿದುವೆ ಋಜುವಾತು, ಕಟು ಸತ್ಯವೇ ಇದು.
ತೊರೆದಿರುವೆ ನನ್ನ - ಕಾರಣವೇನಾದರೂ ಇರಲಿ,
ನೀ ಬಯಸಿದಂತೆಯೇ ನಿನಗೆಲ್ಲವೂ ಸಿಗಲಿ.

ಸಾಕು ಹೊರಡುವೆನಿನ್ನು - ಈ ಅಂಧಕಾರದಲಿ,
ಮುಂದೆ ಕಾದಿದೆ ಪಯಣ ಕೊನೆಯಿರದ ಹಾದಿಯಲಿ;
ಹೊತ್ತೊಯ್ಯುವೆನು ನಮ್ಮ ನೆನಪುಗಳ ಜೊತೆಯಲ್ಲಿ,
ಆಡದೇ ಉಳಿದ ಮಾತುಗಳು ಹುದುಗಿಹವು ಮನದಲ್ಲಿ.
ನನ್ನ ಪಯಣದಲಿ ಆಪ್ತ ಸಂಗಾತಿಗಳಿದುವೆ,
ಅದರ ಜೊತೆಗೇ ಬಂದು ಕಾಡುವವು  - ಮಡಿದ ಆ ಕನಸುಗಳು.
ಎಲ್ಲ ನೋವನು ಸಹಿಸಿ ದೈವಕ್ಕೆ ಮೊರೆಯಿಡುವೆ,
ಸುಖವೆಂದೂ ನಿನಗಿರಲಿ, ನನ್ನ ಪಾಲಿಗೇ ಇರಲಿ ಈ ಎಲ್ಲ ಕಷ್ಟಗಳು.